Röya Kamil qızı Mirzəbəyova 25 iyul 1992-ci ildə Quba şəhərində anadan olmuşdur. Azərbaycan Dövlət İqtisad Universitetində təhsil almışdır. Hal-hazırda doktorantdır. AMEA Şərqşünaslıq İnstitutunda elmi işçi kimi çalışır. Eyni zamanda həvəskar rəssamdır. Kətan üzərində yağlı boya texnikasına üstünlük verən rəssam uşaq yaşlarından rəsm çəkməyə başlamışdır. Forma və məzmun dolğunluğu əsərlərinin əsas qayəsini təşkil edir. Rəsmlərinin emosional və ekspressiv əlvanlığa malik olması üçün güclü konturlardan istifadə etməklə rəsmə yeni nizam gətirən rəssam əsərlərində isti, saf və parlaq rənglərdən istifadə edir. Bu da onun əsərlərini romantizm və sentimentalizm ruhuna yaxınlaşdırır.

“Sevgi çiçəyi”, “İşıq”, “Mavi Xəzər”, “Qədim və müasir Bakı”, “Ağdam məscidi” və “Qarabağ atı” kimi əsərləri Azərbaycan Gənclər Fondu, Azərbaycan Tələbə Gənclər Təşkilatları İttifaqı, Zirvə Ziyalılar Təşkilatı və Azərbaycan Milli Elmlər Akademiyası tərəfindən keçirilən bir çox sərgilərdə nümayiş olunmuş və sertifikatlara layiq görülmüşdür.